ಮಹಿಳೆಗೆ ಅಪಮಾನ ಮಾಡಿದ ಅಪರಾಧಿಗೆ 2 ವರ್ಷ ಶಿಕೆ; ದಂಡ

ಭಟ್ಕಳ :ಮಹಿಳೆಯೋರ್ವಳ ಮೇಲೆ ಇರುವ ದ್ವೇಷದಿಂದ ಆಕೆಯ ಮನೆಗೆ ಅಕ್ರಮ ಪ್ರವೇಶ ಮಾಡಿ ಆಕೆಯನ್ನು ಅವಾಚ್ಯ ಶಬ್ಧಗಳಿಂದ ಬೈದು, ಮೈಮೇಲೆ ಕೈ ಹಾಕಿ ಅಪಮಾನಗೊಳಿಸಿದ್ದಲ್ಲದೇ ಆಕೆಯ ಬಟ್ಟೆಯನ್ನು ಹಿಡಿದು ಎಳೆದು ಲಂಗವನ್ನು ಹರಿದು ಹಾಕಿ, ಆಕೆಯ ಮಕ್ಕಳನ್ನು ಮುಂದೆ ಬರದಂತೆ ಬೆದರಿಕೆ ಹಾಕಿದ್ದ ಪ್ರಕರಣದ ಕುರಿತ ವಿಚಾರಣೆ ನಡೆಸಿ ಇಲ್ಲಿನ ಜೆ.ಎಂ ಎಫ್.ಸಿ. ನ್ಯಾಯಾಧೀಶ ಫವಾಜ್ ಪಿ.ಎ ಅವರು ಆರೋಪಿಮೇಲಿನ ಆರೋಪ ಸಾಬೀತಾದ ಕಾರಣ ಆರೋಪಿಗೆ ಶಿಕ್ಷೆ ಹಾಗೂ ದಂಡ ವಿಧಿಸಿ ತೀರ್ಪು ನೀಡಿದ್ದಾರೆ.

ಅನಿವಾಸಿ ಭಾರತೀಯ ಬಂದರ ರಸ್ತೆಯ ಇರ್ಷಾದ್ ಅಹಮ್ಮದ್ ಖಾಜಿಯಾ ಎನ್ನುವವನೇ ದಂಡ ಹಾಗೂ ಶಿಕ್ಷೆಗೆ ಗುರಿಯಾದವನಾಗಿದ್ದಾನೆ, ಈತನಿಗೆ ಕಲಂ 341ರ ಅಡಿಯಲ್ಲಿ 3 ತಿಂಗಳ ಸಜೆ, ರೂ. 250 ದಂಡ, ಕಲಂ 323ರ ಅಡಿಯಲ್ಲಿ 1 ವರ್ಷ ಸಜೆ, ರೂ. 1000 ದಂಡ, ಕಲಂ 354ರ ಅಡಿಯಲ್ಲಿ 2 ವರ್ಷ ಸಜೆ, ರೂ. 7000 ದಂಡ, ಕಲಂ 504ರ ಅಡಿಯಲ್ಲಿ 7 ತಿಂಗಳು ಸಜೆ, ರೂ. 250 ದಂಡ ಕಲಂ 506 ಅಡಿಯಲ್ಲಿ 7 ತಿಂಗಳು ಸಜೆ, ರೂ. 500 ದಂಡ ಅಂತೂ 2 ವರ್ಷ ಸಜೆ, ರೂ. 9150 ದಂಡ ಹಾಗೂ ಪಿರ್ಯಾದಿಗೆ ರೂ. 5000 ಪರಿಹಾರ ನೀಡುವಂತೆ ಆದೇಶ ಮಾಡಿದ್ದಾರೆ.

ಆರೋಪಿತನು ಅಮೇರಿಕಾದ ಪ್ರಜೆಯಾಗಿದ್ದು ಕಳೆದ ಹಲವಾರು ವರ್ಷಗಳಿಂದ ತಪ್ಪಿಸಿಕೊಂಡಿದ್ದನು. 2013ರಲ್ಲಿ ಪ್ರಕರಣ ದಾಖಲಾಗಿದ್ದ ತನಿಖೆಯ ವೇಳೆ ಹಾಜರಾಗದೇ ಇರುವ ಕಾರಣಕ್ಕೆ ವಾರಂಟ್ ಹೊರಡಿಸಲಾಗಿತ್ತು. ಆರೋಪಿಯ ಭಾರತಕ್ಕೆ ಬಂದು ವಾಪಾಸು ಹೋಗುವ ಸುಳಿವು ದೊರೆತ ಕಾರಣ ಆತನನ್ನು ಬಂಧಿಸುವಲ್ಲಿ ಪೊಲೀಸರು ಯಶಸ್ವಿಯಾಗಿದ್ದರು.