ಹಳಿಯಾಳದಲ್ಲಿ ದುರ್ಗಾದೌಡಗೆ ವಿಜೃಂಭಣೆಯ ಚಾಲನೆ-9 ದಿನಗಳ ಕಾಲ ನಡೆಯಲಿರುವ ಧಾರ್ಮಿಕ ಉತ್ಸವ.

ಹಳಿಯಾಳ:- ಶ್ರೀ ಶಿವ ಪ್ರತಿಷ್ಠಾನ, ದುರ್ಗಾದೌಡ ಸಮೀತಿ ಹಾಗೂ ವಿವಿಧ ಹಿಂದೂ ಸಂಘಟನೆಗಳಿಂದ ಹಳಿಯಾಳದಲ್ಲಿ ನವರಾತ್ರಿ ಉತ್ಸವದ ಅಂಗವಾಗಿ 9 ದಿನಗಳ ಕಾಲ ನಡೆಯುವ “ದುರ್ಗಾದೌಡ” ಧಾರ್ಮಿಕ ನಡಿಗೆ ಕಾರ್ಯಕ್ರಮಕ್ಕೆ ಭಾನುವಾರ ಬೆಳಿಗಿನ ಜಾವ ಹಳಿಯಾಳದ ಶ್ರೀ ಮಹಾಗಣಪತಿ ದೇವಸ್ಥಾನದಿಂದ ಚಾಲನೆ ನೀಡಲಾಗಿದೆ.
ಪಟ್ಟಣದ ಮಹಾಗಣಪತಿ ದೇವಸ್ಥಾನದಲ್ಲಿ ಶಿವಪ್ರತಿಷ್ಠಾನ, ದುರ್ಗಾದೌಡ ಸಮೀತಿಯವರು ಹಾಗೂ ಮಹಿಳಾ ಸಂಘಟನೆಯವರು ಗಣಪತಿಗೆ ಹಾಗೂ ಭಗವಾಧ್ವಜಕ್ಕೆ ವಿಶೇಷ ಪೂಜೆ ಸಲ್ಲಿಸುವುದರ ಮೂಲಕ ದುರ್ಗಾದೌಡ ಧಾರ್ಮಿಕ ಕಾರ್ಯಕ್ರಮವನ್ನು ಆರಂಭಿಸಿದರು.

ಮಹಾಗಣಪತಿ ದೇವಸ್ಥಾನದಿಂದ ಹೊರಟ ದುರ್ಗಾದೌಡ ಸದಾಶೀವನಗರ, ಗಣೇಶ ನಗರ, ಹೊರಗಿನ ಗುತ್ತಿಗೇರಿ, ಆನೆಗುಂದಿ ಬಡಾವಣೆ, ಬಸ್ ನಿಲ್ದಾಣ ರಸ್ತೆ, ಇಂದಿರಾನಗರದ ಮೂಲಕ ಶ್ರೀನಾಗನಾಥ ಸುಬ್ರಹ್ಮಣ್ಯ ದೇವಸ್ಥಾನ ಬಳಿಕ ಬಸವೇಶ್ವರ ವೃತ್ತ, ಶಿವಾಜಿ ಸರ್ಕಲ್ ಮೂಲಕ ದುರ್ಗಾನಗರದ ಪೋಲಿಸ್ ಲೈನ್‍ನಲ್ಲಿರುವ ದುರ್ಗಾದೇವಿ ದೇವಸ್ಥಾನಕ್ಕೆ ತೆರಳಿ ಒಂದು ದಿನದ ದುರ್ಗಾದೌಡ ಸಂಪನ್ನಗೊಂಡಿತು. ನಾಳೆ ಸೋಮವಾರ ಬೆಳಿಗ್ಗೆ 5.30 ಗಂಟೆಯಿಂದ ಇಲ್ಲಿಂದಲೇ ದುರ್ಗಾದೌಡ ಆರಂಭವಾಗುತ್ತದೆ.

ಪ್ರಥಮ ದಿನದ ದೌಡಗೆ ನಿರೀಕ್ಷೆಗೂ ಮೀರಿ ಜನಸಾಗರ ಹರಿದು ಬಂದಿತ್ತು. ಎಲ್ಲೆಡೆ ಬೃಹತ್ ಕೇಸರಿ ಭಗವಾ ಧ್ವಜಗಳು, ಕೇಸರಿ ಪತಾಕೆಗಳು, ದುರ್ಗಾದೌಡ ಹೊರಡುವ ಬಡಾವಣೆಗಳಲ್ಲಿ ರಸ್ತೆಯ ಮೇಲೆಲ್ಲ ವಿವಿಧ ಚಿತ್ತಾರದ ಆಕರ್ಷಕ ರಂಗೋಲಿಗಳು, ತಳಿರು ತೊರಣಗಳಿಂದ ಶೃಂಗರಿಸಿದ ಬಡಾವಣೆಗಳು, ದೇವಿಯ ಭಾವಚಿತ್ರಗಳನ್ನಿಟ್ಟು ಪೂಜೆ ಸಲ್ಲಿಸಿರುವುದು, ಸುಮಾರು 80 ಕ್ಕೂ ಅಧಿಕ ಮಕ್ಕಳಿಂದ ಅಕ್ಕಮಹಾದೇವಿ, ಭಾರತಾಂಬೆ, ದುರ್ಗಾಮಾತೆ, ಸರಸ್ವತಿ, ಶಾರದೆ, ಶಿವಾಜಿ ಮಹಾರಾಜರು, ಆಂಜನೇಯ ಹೀಗೆ ಹಲವು ಛದ್ಮವೇಷ, ಭೂಷಣಗಳಲ್ಲಿ ಕಂಗೊಳಿಸಿ ದೌಡಗೆ ಮೆರಗು ತಂದರು.