ಚತುಷ್ಪಥ ಕಾಮಗಾರಿ;ನೆಲಸಮವಾಗಲಿರುವ ನೂರಾರು ವರ್ಷಗಳ ಹಿಂದಿನ ಐತಿಹಾಸಿಕ ಕಟ್ಟಡಗಳು

ಕಾರವಾರ: ರಾಷ್ಟ್ರೀಯ ಹೆದ್ದಾರಿ ಚತುಷ್ಪಥ ಕಾಮಗಾರಿಗೆ ನಗರದಲ್ಲಿರುವ ನೂರಾರು ವರ್ಷಗಳ ಹಿಂದಿನ ಐತಿಹಾಸಿಕ ಕಟ್ಟಡಗಳು ನೆಲಸಮವಾಗಲಿದೆ.
ಬ್ರಿಟಿಷರು 1864ರಲ್ಲಿ ತಮ್ಮ ವ್ಯಾಪಾರಕ್ಕಾಗಿ ಕಾರವಾರವನ್ನು ಜಿಲ್ಲಾ ಕೇಂದ್ರವನ್ನಾಗಿ ಮಾಡಿಕೊಂಡು ನಗರಕ್ಕೆ ರೂಪವನ್ನು ನೀಡಿದ್ದರು. ನಂತರದ 50 ವರ್ಷಗಳ ಅವಧಿಯಲ್ಲಿ ಲೋಕೋಪಯೋಗಿ ಕಾರ್ಯನಿರ್ವಾಹಕ ಇಂಜಿನಿಯರ್ ಕಚೇರಿ, ಅಂಚೆ ಕಚೇರಿ, ಶಿಕ್ಷಣ ಇಲಾಖೆಗಳ ಕಚೇರಿಗಳನ್ನು ನಿರ್ಮಾಣ ಮಾಡಿದ್ದರು. ಅಂದು ನಿರ್ಮಿಸಿದ ಆ ಕಟ್ಟಡಗಳು ಈಗಲೂ ಬಲಿಷ್ಠವಾಗಿದ್ದು ಇಲಾಖೆ ಕಚೇರಿಗಳು ಅಲ್ಲಿಯೇ ಕಾರ್ಯ ನಿರ್ವಹಿಸುತ್ತಿವೆ. ಈಗ ಚತುಷ್ಪಥ ಹೆದ್ದಾರಿ ಕಾಮಗಾರಿಗೆ ಅವುಗಳನ್ನು ಒಡೆಯಲು ಗುರುತು ಹಾಕಲಾಗಿದೆ.
ತೋಡೂರಿನಲ್ಲಿ ಅತಿ ಹೆಚ್ಚು ಖಾಸಗಿ ಭೂಮಿ ಸ್ವಾಧೀನ ಪಡಿಸಿಕೊಳ್ಳಬೇಕಿದ್ದು ಮನೆಗಳ ಮೌಲ್ಯಮಾಪನ ಆಗಿದೆ. ಚೆಂಡಿಯಾ, ಚಿತ್ತಾಕುಲಾ ಗ್ರಾಮಗಳಲ್ಲಿ ಇನ್ನೂ ಸಾಕಷ್ಟು ಖಾಸಗಿ ಭೂಮಿ ವಶಕ್ಕೆ ಪಡೆಯುವುದು ಬಾಕಿ ಇದೆ. ಅಮದಳ್ಳಿಯಲ್ಲಿ ಬೈಪಾಸ್ ಮೂಲಕ ರಸ್ತೆ ನಿರ್ಮಿಸಲು ಸ್ಥಳೀಯರು ಹಾಗೂ ಶಾಸಕರು ಹೋರಾಟ ನಡೆಸಿದ್ದರಾದರೂ ಒಪ್ಪಿಗೆ ದೊರೆಯದೆ ಸದ್ಯ ಈಗಿರುವ ರಸ್ತೆಯ ಪಕ್ಕದಲ್ಲೇ 45 ಮೀಟರ್ ಸ್ವಾಧೀನ ಪ್ರಕ್ರಿಯೆಗೆ ಚಾಲನೆ ನೀಡಲಾಗಿದೆ.
ಬಿಣಗಾದಿಂದ ಕೈಗೊಂಡು ಕಾರವಾರದ ಲಂಡನ್ ಬ್ರಿಜ್‍ನವರೆಗೆ ಸುರಂಗದ ಮೂಲಕ ಚತುಷ್ಪಥ ಕಾಮಗಾರಿ ಮಾಡಲು ಯೋಜನೆ ರೂಪಿಸಲಾಗಿದ್ದು ಸುರಂಗ ನಿರ್ಮಾಣ ಕಾಮಗಾರಿ ಶೇ. 80 ರಷ್ಟು ಪೂರ್ಣಗೊಂಡಿದೆ. ಇನ್ನು ಸುರಕ್ಷಾ ಕ್ರಮಗಳನ್ನು ಕೈಗೊಳ್ಳುವ ಕಾರ್ಯ ಬಾಕಿ ಇದೆ ಎಂದು ಐಆರ್‍ಬಿ ಕಂಪನಿ ಮಾಹಿತಿ ನೀಡಿದೆ. ಕಾಳಿ ನದಿಗೆ ನಿರ್ಮಿಸಲಾಗುತ್ತಿರುವ ಮತ್ತೊಂದು ಸೇತುವೆ ಕಾರ್ಯ ಕೂಡ ಮುಕ್ತಾಯ ಹಂತದಲ್ಲಿದೆ. ಇನ್ನು ಗುಡ್ಡಗಳನ್ನು ತೆರವು ಮಾಡುವ ಕಾರ್ಯ ಮಾತ್ರ ಬಂಡೆಗಳಿಂದಾಗಿ ಕಷ್ಟಕರ ಪರಿಸ್ಥಿತಿಯಲ್ಲಿದೆ.
ತಾಲೂಕಿನಲ್ಲಿ ಚತುಷ್ಪಥ ಹೆದ್ದಾರಿ ನಿರ್ಮಾಣಕ್ಕಾಗಿ 38.35 ಹೆಕ್ಟೇರ್ ಭೂಮಿ ಸ್ವಾಧೀನಕ್ಕೆ 3ಡಿ ನೋಟಿಫಿಕೇಶನ್ ಹೊರಡಿಸಲಾಗಿತ್ತು. ಅದರಲ್ಲಿ 4.3 ಹೆಕ್ಟೇರ್ ಸರಕಾರಿ ಭೂಮಿಯಾಗಿದ್ದು ಉಳಿದವು ಖಾಸಗಿ ಭೂಮಿಯಾಗಿದೆ. ಅದರಲ್ಲಿ ಇದುವರೆಗೆ ಒಟ್ಟು 14.61 ಹೆಕ್ಟೇರ್ ಭೂಮಿಯನ್ನು ಸ್ವಾಧೀನ ಮಾಡಿಕೊಳ್ಳಲಾಗಿದೆ. ಇನ್ನುಳಿದಂತೆ ಮಾಜಾಳಿಯಲ್ಲಿ 3.57 ಹೆಕ್ಟೇರ್ (0.14 ಹೆ. ಸರಕಾರಿ ಭೂಮಿ), ಚಿತ್ತಾಕುಲಾದಲ್ಲಿ 0.88(0.018), ಕೋಡಿಬಾಗದಲ್ಲಿ 1.24(1.07), ಬಾಡದಲ್ಲಿ ಕಾರವಾರ ನಗರ ಅಂದರೆ ಬಾಡದಲ್ಲಿ 0.70 ಸಂಪೂರ್ಣ ಸರ್ಕಾರಿ ಭೂಮಿ, ಬಿಣಗಾದಲ್ಲಿ 7.61(0.52 ಸರ್ಕಾರಿ ಭೂಮಿ), ಅರಗಾದಲ್ಲಿ 2.41(0.11), ಚೆಂಡಿಯಾದಲ್ಲಿ 7.15(0.01), ತೋಡೂರಿನಲ್ಲಿ 8.50(0.25), ಅಮದಳ್ಳಿಯಲ್ಲಿ 6.23(1.25). ಸ್ವಾಧೀನಕ್ಕೆ ಯೋಜನೆ ರೂಪಿಸಲಾಗಿದೆ. ಖಾಸಗಿ ಭೂಮಿ ಸ್ವಾಧೀನಕ್ಕಾಗಿ ಪರಿಹಾರ ವಿತರಿಸಲು 56 ಕೋಟಿ ರೂ. ಹಣ ಬಿಡುಗಡೆಯಾಗಿದೆ.