ಅಂತರಾಷ್ಟ್ರೀಯ “ರೋಡ್ ರೀಲ್ಸ್” ಕಿರುಚಿತ್ರ ನಿರ್ಮಾಣ ಸ್ಪರ್ದೆಗೆ ಹೊನ್ನಾವರದ ಹುಡುಗರ “ಮಿಸ್ಟರಿ ಅನ್ ಸಾಲ್ವಡ್ “

ಸಂಪೂರ್ಣ ಹೊನ್ನಾವರದ ಪ್ರತಿಭೆಗಳಿಂದ ಇಲ್ಲಿನ ಪರಿಸರದಲ್ಲಿಯೇ ನಿರ್ಮಾಣವಾದ ಮಿಸ್ಟರಿ ಅನ್ ಸಾಲ್ವಡ್ ಎನ್ನುವ ಕಿರುಚಿತ್ರ ಅಂತರಾಷ್ಟ್ರೀಯ ಕಿರುಚಿತ್ರ ನಿರ್ಮಾಣ ಸ್ಪರ್ದೆಯಾಗಿರುವ ಮೈ ರೋಡ್ ರೀಲ್ಸ್ ಸ್ಪರ್ದೆಗೆ ನಾಮಿನೇಟ್ ಆಗುವ ಮೂಲಕ ಹೊಸದೊಂದು ಭರವಸೆಯನ್ನು ಹುಟ್ಟುಹಾಕಿದೆ.
ಓದು ಬರಹ ಆಟ ಪಾಠ ಎಂದುಕೊಳ್ಳುವ ವಯಸ್ಸಿನಲ್ಲಿಯೇ ಬಣ್ಣದ ಬದುಕಿನ ಬಗ್ಗೆ ಕುತೂಹಲ ಹಾಗೂ ಆಸಕ್ತಿಯನ್ನು ಹೊಂದಿ ಬಿಡುವಿನ ವೇಳೆಯಲ್ಲಿ ಹೊಸತೇನಾದರೂ ಸೃಷ್ಟಿಸಬೇಕೆನ್ನುವ ತುಡಿತದೊಂದಿಗೆ ಕಿರು ಚಿತ್ರ ನಿರ್ಮಾಣದ ಗೀಳನ್ನು ಹಚ್ಚಿಕೊಂಡು ಮುಚ್ಚಿಡಲಾರೆ ಎನ್ನುವ ಪ್ರೇಮ ಗೀತೆಯೊಂದಕ್ಕೆ ದೃಶ್ಯಕಾವ್ಯ ಬರೆದಿದ್ದ ಡಿಪ್ಲೋಮಾ ವಿದ್ಯಾರ್ಥಿ ಪ್ರಮಥ್ ನಾಯ್ಕ ಮಿಸ್ಟರಿ ಅನ್ ಸಾಲ್ವಡ್ ಕಿರುಚಿತ್ರದ ನಿರ್ಮಾಣ ನಿರ್ದೇಶನ ಸಂಭಾಷಣೆಯ ಸಂಪೂರ್ಣ ಜವಾಬ್ಧಾರಿ ಹೊತ್ತುಕೊಂಡಿದ್ದಾನೆ.
ಕಿರುಚಿತ್ರದಲ್ಲಿ ಬರುವ ಪಾತ್ರಗಳಿಗೆ ನ್ಯಾಯ ಒದಗಿಸುವ ಕೆಲಸವನ್ನು ತಾರಾಗಣದಲ್ಲಿರುವ ಶರತ್ ಭಂಡಾರಿ, ಅಂಕಿತಾ ಭಟ್, ಅರವಿಂದ ಹೆಗಡೆ, ಶ್ವೇತಾ ಗೌಡ, ಮೋಹನ್ ಹೆಗಡೆ ಮಾಡಿದ್ದಾರೆ. ಕಿರುಚಿತ್ರ ನಿರ್ಮಾಣಕ್ಕೆ ಸನತ್ ನಾಯ್ಕ, ವಿನಯ್ ಭಟ್, ಸ್ವಾತಿ ಕಾಮತ್ ಸಹಕಾರ ನೀಡಿದ್ದನ್ನು ಚಿತ್ರ ತಂಡ ಸ್ಮರಿಸುತ್ತಿದೆ.
ಸ್ಪರ್ದೆಗೆ ಕರ್ನಾಟಕದಿಂದ ಆಯ್ಕೆಯಾಗಿರುವ ಏಕೈಕ ಕಿರುಚಿತ್ರ ಮಿಸ್ಟರಿ ಅನ್ ಸಾಲ್ವಡ್ ಆಗಿದ್ದು ಭಾರತದಿಂದ ನಾಮಿನೇಟ್ ಆದ ಕಿರುಚಿತ್ರಗಳಲ್ಲಿ ಇಲ್ಲಿಯವರೆಗೆ ಮೊದಲ ಸ್ಥಾನದಲ್ಲಿ ಮುಂದುವರಿಯುತ್ತಿದೆ. ವಿಜ್ಞಾನಕ್ಕೆ ಸವಾಲಾಗಿರುವ ವ್ಯಕ್ತಿಯೊಬ್ಬನ ಮಾನಸಿಕ ತುಮುಲಗಳನ್ನು ಸಶಕ್ತವಾಗಿ ಬಿಂಬಿಸುವ ಕಥಾ ಹಂದರವನ್ನು ಕೇವಲ ಮೂರುವರೆ ನಿಮಿಷದಲ್ಲಿ ಕಟ್ಟಿಕೊಡುವಲ್ಲಿ ವಯಸ್ಸಿಗೆ ಮೀರಿದ ಪ್ರಭುದ್ಧತೆಯನ್ನು ನಿರ್ದೇಶಕ ಪ್ರಮಥ್ ತೋರಿದ್ದಾರೆ.
ರೋಡ್ ಮೈಕ್ರೋಪೋನ್ಸ್ ಏರ್ಪಡಿಸಿರುವ ಸ್ಪರ್ದೆಯಲ್ಲಿ ಪ್ರಪಂಚದ ನೂರಾರು ಕಿರುಚಿತ್ರಗಳು ಸ್ಪರ್ದಿಸಲಿದ್ದು 28 ವಿಭಾಗಗಳಲ್ಲಿ ಬಹುಮಾನ ಪ್ರಮಾಣಪತ್ರಗಳನ್ನು ನೀಡುವ ಈ ಅಭಿಯಾನದಲ್ಲಿ ಆನ್ಲೈನಲ್ಲಿಯೇ ನಿರ್ಣಾಯಕರು ಸಿನೆಮಾ ವೀಕ್ಷಣೆಮಾಡಿ ಚಿತ್ರದ ಗುಣಮಟ್ಟವನ್ನು ನಿರ್ಧರಿಸಲಿದ್ದಾರೆ.
ಶಂಕರನಾಗ್ ಅನಂತನಾಗ್ ಮೊದಲಾದ ಅಭಿಜಾತ ಪ್ರತಿಭೆಗಳನ್ನು ಬಣ್ಣದ ಜಗತ್ತಿಗೆ ಕೊಡುಗೆಯಾಗಿ ಕೊಟ್ಟಿರುವ ಹೊನ್ನಾವರದ ಮಣ್ಣಿನಲ್ಲಿ ಪ್ರತಿಭೆಗಳಿಗೆ ಬರವಿಲ್ಲ ಎನ್ನುವುದನ್ನು ಹಲವಾರು ಪ್ರತಿಭೆಗಳು ಮತ್ತೆ ಮತ್ತೆ ಸಾಬೀತು ಪಡಿಸುತ್ತಲೇ ಇದ್ದು ಇದೀಗ ಇಲ್ಲಿನ ಹುಡುಗರ ಕಿರುಚಿತ್ರವೊಂದು ಅಂತರಾಷ್ಟ್ರೀಯ ಸ್ಪರ್ದೆಗೆ ನಾಮನಿರ್ದೇಶಿತಗೊಳ್ಳುವ ಮೂಲಕ ಈ ಪರಂಪರೆ ಮುಂದುವರೆಯುವ ಸೂಚನೆಯನ್ನು ರವಾನಿಸಿದೆ.
[ಸಿನೆಮಾ ಜಗತ್ತಿನ ಪ್ರತಿಭೆಗಳನ್ನು ಶೋಧಿಸುವ ಮೈ ರೋಡ್ ರೀಲ್ ಸ್ಪರ್ದೆಗೆ ಹಿಂದಿನ ವರ್ಷ ಕರ್ನಾಟಕದಿಂದ ಯಾವ ಕಿರುಚಿತ್ರವೂ ಸ್ಪರ್ದಿಸಿರಲಿಲ್ಲ ಹಾಗಾಗಿ ನಾವು ಒಂದು ಪ್ರಯತ್ನ ಮಾಡಿನೋಡೋಣ ಅಂತ ಪ್ರಯತ್ನಿಸಿದ್ದೇವೆ ಅಷ್ಟೇ ಎಲ್ಲರ ಸಹಕಾರ ಹಾಗೂ ಪ್ರೋತ್ಸಾಹದಿಂದ ಇದು ಸಾಧ್ಯವಾಗಿದೆ. ನೀವು ಲಿಂಕ್ ಓಟ್ ಮಾಡಿ ಪೋತ್ಸಾಹಿಸಿ ಎಂದು ಕೇಳಿಕೊಂಡರು. – ಪ್ರಮಥ್,ಕಿರುಚಿತ್ರದ ನಿರ್ದೇಶಕ]