ರಸ್ತೆಯಲ್ಲಿಯೇ ಬಸ್ಟ್ಯಾಂಡ್ – ದಿನದಿಂದ ದಿನಕ್ಕೆ ಬಿಗಡಾಯಿಸುತ್ತದೆ ಸಮಸ್ಯೆ

ಅಂಗಡಿ ಮುಂಗಟ್ಟು..ಮರದ ನೆರಳಲ್ಲಿ ಪ್ರಯಾಣಿಕರ ಆಶ್ರಯ – ಕುಡಿಯುವ ನೀರು, ಶೌಚಾಲಯವಿಲ್ಲದೇ ಸಿಬ್ಬಂದಿಗಳಿಗೂ ಪಜೀತಿ

ಹೊನ್ನಾವರ – ನೂತನ ಬಸ್‍ನಿಲ್ದಾಣದ ಉದ್ದೇಶಕ್ಕಾಗಿ ಸ್ಥಳಾಂತರಗೊಂಡು ಪೊಲೀಸ್ ಗ್ರೌಂಡ್‍ವರೆಗೂ ಹೋಗಿ ವಾಪಸ್ ಬಂದು ರಿಕ್ಷಾ ಸ್ಟ್ಯಾಂಡ್‍ನಲ್ಲಿ ನೆಲೆಗೊಂಡಿರುವ ಬಸ್ಟ್ಯಾಂಡ್‍ನಲ್ಲಿ ಪ್ರಯಾಣಿಕರಿಗೆ ಕುಳಿತುಕೊಳ್ಳುವುದಕ್ಕೂ ಜಾಗ, ಕುಡಿಯುವ ನೀರು, ಶೌಚಾಲಯದಂತ ಮೂಲಭೂತ ಸೌಲಭ್ಯಗಳಿಲ್ಲದ ಕಾರಣ ಪ್ರಯಾಣಿಕರು ಸಿಬ್ಬಂದಿಗಳು ಪರದಾಡುವಂತಾಗಿದೆ.

ಆಧುನಿಕ ಸೌಲಭ್ಯಗಳನ್ನೊಳಗೊಂಡ ಸುಸಜ್ಜಿತ ಹೊಸ ಬಸ್ ನಿಲ್ದಾಣ ಕಾಮಗಾರಿ ನಡೆಯುತ್ತಿದೆ ಎನ್ನುವ ಖಷಿ ಒಂದೆಡೆಯಿದ್ದರೂ ನಿರ್ಮಾಣ ಕಾಮಗಾರಿ ಪೂರ್ಣಗೊಳ್ಳುವ ವರೆಗೆ ಯಾವುದೇ ಸೌಲಭ್ಯವಿಲ್ಲದ ಸ್ಥಿತಿಯನ್ನು ಸಹಿಸಿಕೊಳ್ಳಬೇಕಾದ ಅನಿವಾರ್ಯತೆಯೂ ಸೃಷ್ಟಿಯಾಗಿದೆ. ಕೊರೊನಾ ಭಯ ಎನ್ನುವುದು ಬೆನ್ನಿಗೆ ಬಿದ್ದ ಬೇತಾಳನಂತೆ ಕಾಯುತ್ತಿದ್ದರೂ ಅನಿವಾರ್ಯ ಕಾರಣಗಳಿಗೆ ಜನರು ಮನೆಯಿಂದ ಹೊರಗೆ ಬರುತ್ತಿದ್ದಾರೆ. ದೂರದ ಊರುಗಳಿಂದ ಬರುವ ಪ್ರಯಾಣಿಕರು ಹೊನ್ನಾವರ ಬಸ್‍ನಿಲ್ದಾಣದಲ್ಲಿ ಇಳಿದು ಶೌಚಾಲಯವನ್ನು ಹುಡುಕಿ ಎಲ್ಲಾ ಕಡೆ ಓಡುವ ದೃಶ್ಯ ಮಾಮೂಲಿಯಂತಾಗಿದೆ.
ರಸ್ತೆಯೇ ಬಸ್ಟ್ಯಾಡ್ ಆಗಿರುವುದರಿಂದ ಬಸ್ಸಿನಿಂದ ಇಳಿದ ಪ್ರಯಾಣಿಕರು ಹಾಗೂ ತಮ್ಮೂರಿನ ಬಸ್ಸಿನ ಬರುವಿಕೆಯನ್ನು ಕಾಯುತ್ತಾ ಕುಳಿತ ಮಂದಿ ಅನಿವಾರ್ಯವಾಗಿ ಸಮೀಪದ ಅಂಗಡಿಮುಂಗಟ್ಟುಗಳನ್ನೇ ಆಶ್ರಯಿಸುತ್ತಿದ್ದಾರೆ. ಪ್ರಯಾಣಿಕರು ಸಿಕ್ಕ ಸಿಕ್ಕಲ್ಲಿ ಉಗುಳುತ್ತಾರೆ ಎಂದು ಒಳಗೊಳಗೇ ಆಕ್ರೋಶ ವ್ಯಕ್ತಪಡಿಸುತ್ತಿದ್ದರೂ ಸಾರ್ವಜನಿಕರ ವಿರೋಧ ಕಟ್ಟಿಕೊಳ್ಳಬೇಕಾಗುತ್ತದೆ ಎನ್ನುವ ಕಾರಣಕ್ಕೆ ಅಂಗಡಿಕಾರರು ತಮ್ಮ ಅಸಮದಾನವನ್ನು ಬಹಿರಂಗವಾಗಿ ಹೇಳಿಕೊಳ್ಳುತ್ತಿಲ್ಲ.

ಉತ್ತಮವಾದುದನ್ನು ಹೊಂದಲು ಕೆಲ ದಿನ ಕಷ್ಟವನ್ನು ಸಹಿಸಿಕೊಳ್ಳಬೇಕು ಎನ್ನುವುದು ನಮಗೂ ಗೊತ್ತಿದೆ ಆದರೆ ಕನಿಷ್ಠ ಮೊಬೈಲ್ ಶೌಚಾಲಯದಂತ ಪರ್ಯಾಯ ವ್ಯವಸ್ತೆಯನ್ನಾದರೂ ಕಲ್ಪಿಸುವುದಕ್ಕೆ ಇರುವ ತೊಂದರೆ ಏನು ಎಂದು ಪ್ರಯಾಣಿಕರು ಪ್ರಶ್ನಿಸುತ್ತಿದ್ದಾರೆ. ಆಸನ ವ್ಯವಸ್ಥೆ ಕಲ್ಪಿಸುವುದಕ್ಕೆ ಕಷ್ಟವಾಗಬಹುದು ಆದರೆ ಕುಡಿಯುವ ನೀರು ಶೌಚಾಲಯದಂತ ಅಗತ್ಯವನ್ನಾದರೂ ಪೂರೈಸಲು ಸಂಬಂಧಪಟ್ಟವರು ಮುಂದಾಗಬೇಕು ಎನ್ನುವ ಆಗ್ರಹ ಕೇಳಿಬರುತ್ತಿದೆ.
ಕುಡಿಯುವ ನೀರನ್ನು ಅಂಗಡಿಯಲ್ಲಿ ಎಲ್ಲಿಯಾದರೂ ಕೇಳಿ ಪಡೆಯಬಹುದು ಆದರೆ ಶೌಚಾಲಯ ಇಲ್ಲದಿರುವುದರಿಂದ ಬಹಳ ಸಮಸ್ಯೆಯಾಗುತ್ತಿದೆ. ಎಲ್ಲಾಕಡೆ ಜನರು ನಿಂತಿರುತ್ತಾರೆ ಹಾಗಂತ ನಿಸರ್ಗ ಕರೆಗೆ ಪ್ರತಿಕ್ರಿಯಿಸದೇ ಇರಲೂ ಸಾಧ್ಯವಿಲ್ಲ. ನಮ್ಮದು ಅನುಭವಿಸಲೂ ಆಗದ ಹೇಳಿಕೊಳ್ಳಲೂ ಸ್ಥಿತಿಯಾಗಿದೆ. – ಸಾರಿಗೆ ಇಲಾಖೆ ನೌಕರ

ಕೆ.ಎಸ್.ಆರ್.ಟಿ.ಸಿ ಪ್ರಯಾಣಿಕರ ತೊಂದರೆ ಆಲಿಸುವ ಮಾತು ಬದಿಗಿರಲಿ ತನ್ನ ಸಿಬ್ಬಂದಿಗಳು ಮೂತ್ರ ವಿಸರ್ಜನೆಗೆ ಪೊದೆಯ ಬದಿಗೆ, ನಿಂತಿರುವ ಟೆಂಪೋ ಮರೆಗೆ ಓಡುವುದನ್ನು ಕಂಡಾದರೂ ಇಲ್ಲಿನ ದುರವಸ್ಥೆಯನ್ನು ಅರ್ಥಮಾಡಿಕೊಳ್ಳಬೇಕಿತ್ತು ಅದು ಇನ್ನೂವರೆಗೂ ಆಗಿಲ್ಲ. ತಕ್ಷಣ ಒಂದು ಮೊಬೈಲ್ ಶೌಚಾಲಯವನ್ನಾದರೂ ಕಲ್ಪಿಸಲು ಸಂಬಪಟ್ಟವರು ಮುಂದಾಗಬೇಕಿದೆ. – ಆನಂದ, ಪ್ರಯಾಣಿಕ