ಯಲ್ಲಾಪುರ : ವೈ.ಟಿ.ಎಸ್.ಎಸ್ ಶಿಕ್ಷಣ ಸಂಸ್ಥೆ ಒಂದು ಆಲದಮರವಿದ್ದಂತೆ. ಒಂದು ಶಿಕ್ಷಣ ಸಂಸ್ಥೆಯ ಪ್ರಾಂಶುಪಾಲರ ಜವಾಬ್ದಾರಿಯನ್ನು ಜಯರಾಮ ಗುನಗಾರವರು ಸಮರ್ಥವಾಗಿ ನಿಭಾಯಿಸಿದ್ದಾರೆ. ಅವರು ತಮ್ಮ ಬಹುಪಾಲು ಸಮಯವನ್ನು ವಿದ್ಯಾರ್ಥಿಗಳ ಶಿಕ್ಷಣಕ್ಕಾಗಿ ಮೀಸಲಿಡುತ್ತಿದ್ದವರು.
ವಿದ್ಯಾರ್ಥಿಗಳನ್ನು ತಮ್ಮ ಮಕ್ಕಳಂತೆ ಪ್ರೀತಿಸಿದವರಿಗೆ ಮಾತ್ರ ಇಂತಹ ಬದ್ಧತೆ ಇರಲು ಸಾಧ್ಯ. ೩೬ವರ್ಷಗಳ ಅವರ ಸೇವಾ ಅವಧಿಯಲ್ಲಿ ಒಂದೇ ಒಂದು ಕಪ್ಪುಚುಕ್ಕೆಯೂ ಇಲ್ಲದಂತೆ ಕರ್ತವ್ಯ ನಿರ್ವಹಿಸಿರುವ ಗುನಗಾ ಅವರ ನಿವೃತ್ತ ಜೀವನ ಸುಖ ಶಾಂತಿಯಿAದ ತುಂಬಿರಲಿ ಎಂದು ಕ್ಷೇತ್ರಶಿಕ್ಷಣಾಧಿಕಾರಿ ಎನ್.ಆರ್ ಹೆಗಡೆ ಹೇಳಿದರು.
ಅವರು ಪಟ್ಟಣದ ವೈ.ಟಿ.ಎಸ್.ಎಸ್ ಶಿಕ್ಷಣ ಸಂಸ್ಥೆಯ ಪ್ರಾಚಾರ್ಯರಾದ ಜಯರಾಮ ಗುನಗಾರವರ ಬೀಳ್ಕೊಡುಗೆ ಸಮಾರಂಭದ ಮಾತನಾಡಿದರು.
ಆಡಳಿತ ಮಂಡಳಿ, ವೈ.ಟಿ.ಎಸ್.ಎಸ್ ನೌಕರರ ಪತ್ತಿನ ಸಹಕಾರಿ ಸಂಘ, ವೈ.ಟಿ.ಎಸ್.ಎಸ್. ಉಪನ್ಯಾಸಕರು ಹಾಗೂ ಶಿಕ್ಷಕರ ವತಿಯಿಂದ ತಮ್ಮ ಸುಧೀರ್ಘ ಸೇವೆಯಿಂದ ನಿವೃತ್ತರಾಗುತ್ತಿರುವ ಜಯರಾಮ ಗುನಗಾ ದಂಪತಿಗಳನ್ನು ಗೌರವಿಸಿ ಸನ್ಮಾನಿಸಲಾಯಿತು.
ಸನ್ಮಾನ ಸ್ವೀಕರಿಸಿ ಮಾತನಾಡಿದ ಜಯರಾಮ ಗುನಗಾ ಅವರು ಜೀವನ ಕಟ್ಟಿಕೊಟ್ಟ ವೈ.ಟಿ.ಎಸ್.ಎಸ್ ಶಿಕ್ಷಣ ಸಂಸ್ಥೆಯಿAದ ನಿವೃತ್ತರಾಗುತ್ತಿರುವ ಸಂದರ್ಭದಲ್ಲಿ ಬಾವುಕರಾಗಿ ಮಾತನಾಡಿದರು. ಶಿಕ್ಷಣ ಸಂಸ್ಥೆಯಲ್ಲಿನ ಸೇವೆ ಆತ್ಮತೃಪ್ತಿ ತಂದಿದೆ. ಪ್ರಾಂಶುಪಾಲನಾಗಿ ಖುಶಿಪಟ್ಟಿದ್ದಕ್ಕಿಂತ ಉಪನ್ಯಾಸಕನಾಗಿಯೇ ಹೆಚ್ಚು ಸಂತಸ ಪಟ್ಟಿದ್ದೇನೆ. ನನಗೆ ಎಲ್ಲವನ್ನೂ ನೀಡಿದ ಸಂಸ್ಥೆ ಇನ್ನಷ್ಟು ಅಭಿವೃದ್ಧಿ ಹೊಂದಲಿ ಎಂದು ಹಾರೈಸುತ್ತಾ ಅಭಿವೃದ್ಧಿ ನಿಧಿಗೆ ೧ಲಕ್ಷರು ದೇಣಿಗೆ ನೀಡಿದರು.ಸಂಸ್ಥೆಯಲ್ಲಿ ಸೇವೆ ಸಲ್ಲಿಸಲು ಅವಕಾಶ ನೀಡಿದ ಆಡಳಿತ ಮಂಡಳೀಯ ಪರವಾಗಿ ಸಂಸ್ಥೆಯ ಅಧ್ಯಕ್ಷ ಗಜಾನನ ಬಾಬುರಾವ ಭಟ್ ಅವರಿಗೆ ಶಾಲು ಹೊದಿಸಿ ಸನ್ಮಾನಿಸಿದರು.
ಆಡಳಿತ ಮಂಡಳಿಯ ಅಧ್ಯಕ್ಷ ಗಜಾನನ ಬಾಬುರಾವ ಭಟ್ ಮಾತನಾಡಿ ಜಯರಾಮ ಗುನಗಾ ರವರಂತಹ ಬದ್ಧತೆಯ ಉಪನ್ಯಾಸಕರನ್ನು ಕಳೆದುಕೊಳ್ಳಲು ಸಂಸ್ಥೆ ಇಷ್ಟ ಪಡುತ್ತಿಲ್ಲ. ಅವರು ಇನ್ನೂ ೨ವರ್ಷಗಳ ಕಾಲವಾದರೂ ಉಪನ್ಯಾಸಕರಾಗಿ ಮುಂದುವರೆಯುವುದಾಗಿ ತಿಳಿಸಿದ್ದಾರೆ. ಸರ್ಕಾರಿ ನಿಯಮದ ಪ್ರಕಾರ ನಿವೃತ್ತರಾದರೂ ಅವರ ಸೇವೆ ಸಂಸ್ಥೆಯಲ್ಲಿ ಮುಂದುವರೆಯಲಿದೆ ಎಂದರು.
ಶಿಕ್ಷಕ ಎನ್.ಎಸ್ ಭಟ್, ಉಪನ್ಯಾಸಕ ಆನಂದ ಹೆಗಡೆಯವರು ಪ್ರಾಚಾರ್ಯರೊಂದಿಗಿನ ತಮ್ಮ ಒಡನಾಟ, ಅವರ ಮಾರ್ಗದರ್ಶನವನ್ನು ಹಂಚಿಕೊAಡರು.
ಆಡಳಿತ ಮಂಡಳಿಯ ಕಾರ್ಯದರ್ಶಿ ರಾಜೇಂದ್ರಪ್ರಸಾದ ಭಟ್, ಖಜಾಂಚಿ ಸದಾನಂದ ದೇಸಾಯಿ. ಸದಸ್ಯರಾದ ರಾಜನ್ ಬಾಳಗಿ, ಬಾಲಕೃಷ್ಣ ನಾಯಕ, ನಾಗರಾಜ ಮದ್ಗುಣಿ, ವಿನಾಯಕ ಪೈ, ಮುಂದಿನ ಪ್ರಾಚಾರ್ಯೆ ವಾಣಿಶ್ರೀ ಹೆಗಡೆ ವೇದಿಕೆಯಲ್ಲಿದ್ದರು.
ಶ್ರಾವಣಿ ಭಟ್ ಪ್ರಾರ್ಥಿಸಿದರು. ಉಪನ್ಯಾಸಕಿ ವಾಣಿಶ್ರೀ ಹೆಗಡೆ ಸ್ವಾಗತಿಸಿದರು. ಸಹಕಾರ್ಯದರ್ಶಿ ರವಿ ಶಾನಭಾಗ ಪ್ರಾಸ್ತಾವಿಕ ನುಡಿದರು. ಶಿಕ್ಷಕ ವಿನೋದ್ ಭಟ್ ನಿರೂಪಿಸಿದರು. ಶಿಕ್ಷಕ ಎನ್.ಎಸ್ ಭಟ್ ವಂದಿಸಿದರು.
Yellapura news:ಸುದ್ದಿ ಹಾಗೂ ಮಾಹಿತಿಗಾಗಿ ನಮ್ಮ ವಾಟ್ಸಪ್ ಗ್ರೂಪ್ ಅನ್ನು ಜಾಯಿನ್ ಆಗಿ
Leave a Comment