ಬದುಕಿಗೆ ಮತ್ತು ಬರವಣಿಗೆಗೆ ಸಾಮ್ಯತೆ ಇರಬೇಕು.

ಯಲ್ಲಾಪುರ-ಕಾವ್ಯವು ಆನಂದದ ಅನುಭೂತಿಯ ಮಾಧ್ಯಮ…
ಸುಪ್ತವಾದ ಪ್ರತಿಭೆಯು ಕಾವ್ಯದ ಮೂಲಕ ಅಭಿವ್ಯಕ್ತಿಸುವ ಮೂಲಕ ಆನಂದದ ಕ್ಷಣಗಳು ಪ್ರಕಟಗೊಳ್ಳಬೇಕು.
ಅಕ್ಷರದ ಸೇವಾಕಾರ್ಯದಲ್ಲಿ ಪ್ರೋತ್ಸಾಹ ಸಿಗಬೇಕು. ಕೃತಿ ರಚನೆಯ ಸ್ಪುರಣೆಯಾಗಿ ಸಾಹಿತ್ಯ ದ ಭಾವ ಮೂಡಿದಾಗ ಒಳ್ಳೆಯ ಕೊಡುಗೆ ನೀಡಲು ಸಾಧ್ಯ.
ಓದಿದ ಮಾತ್ರಕ್ಕೆ ಬರವಣಿಗೆ ಸಿದ್ದಿಸುವುದಿಲ್ಲಾ. ಬರವಣಿಗೆಯೂ ಒಂದು ಸವಾಲಿನ ಕೆಲಸ. ಪರಿಶ್ರಮ ಬೇಕು. ಎಂದು
ಕರ್ನಾಟಕ ಸಚಿವಾಲಯದ ಅಪರ ಕಾನೂನು
ಕಾರ್ಯದರ್ಶಿಗಳಾದ, ಬೆಂಗಳೂರು ಜಿಲ್ಲಾ ಸತ್ರನ್ಯಾಯಾಧೀಶರಾದ ನರಹರಿ ಪ್ರಭಾಕರ ಮರಾಠೆ ಅಭಿಪ್ರಾಯಪಟ್ಟರು.

ಅವರು ಯಲ್ಲಾಪುರ ತಾಲ್ಲೂಕಿನ ಗುಳ್ಳಾಪುರ ಸಮೀಪದ ಹೆಗ್ಗಾರಿನ ಗುಡ್ಡೆಮನೆಯ ಸಮೃದ್ಧಿ ಮನೆಯಂಗಳದಲ್ಲಿ ಉದಯೋನ್ಮುಖ ಬರಹಗಾರ್ತಿ ಪಲ್ಲವಿ ಪ್ರಸನ್ನ ಭಟ್ಟರ ಎರಡು ಕೃತಿಗಳ ಲೋಕಾರ್ಪಣೆ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡುತ್ತಿದ್ದರು. ಭಾವಪಲ್ಲವಿ ಸಂಕಲನವನ್ನು ಬರಹಗಾರ ಎಲ್ ವಿ‌ ಭಟ್ಟ ಅಂಕೋಲಾ ಲೋಕಾರ್ಪಣೆಗೊಳಿಸಿದರು.

ಪಲ್ಲವಿ ಪ್ರಸನ್ನರ ಭಾವದಲೆಗಳ ಮೌನಯಾನ ಗಜಲ್ ಸಂಕಲನವನ್ನು ಲೋಕಾರ್ಪಣೆ ಮಾಡಿ ಮುಖ್ಯ ಅತಿಥಿಗಳಾಗಿ ಮಾತನಾಡಿದ ಪತ್ರಕರ್ತ,ಅಂಕಣಕಾರ, ವಿಠ್ಠಲದಾಸ ಕಾಮತ್ ರವರು ಗ್ರಾಮೀಣ ಭಾಗದಲ್ಲಿ ಅರಳುವ ಸಾಹಿತ್ಯ ದಲ್ಲಿ ಸತ್ವವಿದೆ. ಪಲ್ಲವಿ ಭಟ್ಟರ ಕಾವ್ಯದ ಬರವಣಿಗೆಯಲ್ಲಿ ಬದುಕಿನ ಅನುಭವವಿದೆ. ಕುತೂಹಲದ ಬೆರಗು ಇದೆ. ಬರವಣಿಗೆಗೆ ಮತ್ತು ಬದುಕಿಗೆ ಸಾಮ್ಯತೆ ಇರಬೇಕು. ‌ ಇಂದು ಬದುಕಿನ ರೋಮಾಂಚನವನ್ನೇ ಕಳೆದುಕೊಳ್ಳುವ ಬಗೆಗೆ ವಿಷಾದವಿದೆ. ಬರವಣಿಗೆಯಂತೆ ನಾವು ಬದುಕಿದರೆ ಸಾಹಿತ್ಯ ವನ್ನು ಅನುಭವಿಸಬಹುದು. ಜೊತೆಗೆ ಅಕ್ಷರ ಪ್ರೀತಿಯಿಂದ ಬದುಕನ್ನು ಬರೆದರೆ
ಬೆಳೆಯಬಹುದು. ಕೃತಿಗಳು ಜೀವಂತವಾಗಿರಬೇಕಾದರೆ ಬರಹವು ಓದುಗನ ಜೊತೆಗೆ ಸಂಹವನಗೊಳಿಸಬೇಕು. ಎಂದರು.

ಅಧ್ಯಕ್ಷತೆವಹಿಸಿದ್ದ ಹಿರಿಯ ಸಾಹಿತಿ ವಿಮರ್ಶಕ ಬೆಂಗಳೂರಿನ ಹರಿನರಸಿಂಹ ಉಪಾಧ್ಯಾಯ ರವರು ಮಾತನಾಡಿ
ಸಾಹಿತ್ಯ ಚಲನಶೀಲವಾದದ್ದು. ಯಕ್ಷಗಾನ ಕಲೆ ಈ ಭಾಗದಲ್ಲಿ ಸಾಹಿತ್ಯದ ಆಸಕ್ತಿಯನ್ನು ಬೆಳೆಸಿದೆ.
ಭಾಷೆಯ ಬಗೆಗಿನ ಗೌರವ ಸಾಹಿತ್ಯದ ಮೂಲಧಾತುವಾಗಿದೆ. ಸಾಹಿತ್ಯ ಕ್ಕೆ ಅನಾವರಣಗೊಳ್ಳುವ ಗುಣ ಹೊಂದಿದೆ. ಅದು ಭಾವನೆಯಲ್ಲಿ ಕರಗುವಿಕೆಯಲ್ಲಿ ಯಶಪಡೆಯುತ್ತದೆ. ಪಲ್ಲವಿ ಭಟ್ಟರ ಕಾವ್ಯದಲ್ಲಿ ಸೌಂದರ್ಯ ವಿದೆ. ಮುಕ್ತವಾಗಿ ಗೇಯತೆ ಹೊಂದಿ ಗೆಲುವು ಪಡೆದಿದೆ. ಎಂದರು.

ಪಲ್ಲವಿ ಪ್ರಸನ್ನರ ಭಾವಪಲ್ಲವಿ ಸಂಕಲನವನ್ನು ಮಧುಕೇಶವ ಭಾಗ್ವತ, ಮತ್ತು ಭಾವದಲೆಗಳ ಮೌನಯಾನ ಕೃತಿಯನ್ನು ಬರಹಗಾರ್ತಿ ಸ್ಮಿತಾ ರಾಘವೇಂದ್ರ ಪರಿಚಯಿಸಿದರು.
ವೇದಿಕೆಯಲ್ಲಿ ಕವಯತ್ರಿ ಪಲ್ಲವಿ ಪ್ರಸನ್ನ ಭಟ್ಟ, ಶುಭಾ ನಾಗರಾಜ, ಸಾಮಾಜಿಕ ಕಾರ್ಯಕರ್ತರಾದ ಶಿವರಾಮ ಗಾಂವ್ಕಾರ, ಕನಕನಹಳ್ಳಿ ಗಣಪತಿ ಭಟ್ಟ ಗುಡ್ಡೆ, ಪ್ರಸನ್ನ ಭಟ್ಟ, ಹಾಗೂ ಹೊಂಗಿರಣ ಬಳಗದ ಸದಸ್ಯರು ಉಪಸ್ಥಿತರಿದ್ದರು.

ಶಶಿಕಲಾ ಭಟ್ಟ ಗೋಪಿ ,ಗೀತ ಗಾಯನದ ಮೂಲಕ ಪ್ರಾರ್ಥಿಸಿದರು. ಗಣಪತಿ ಭಟ್ಟ ಗುಡ್ಡೆ ಸ್ವಾಗತಿಸಿದರು. ರಮೇಶ ಭಟ್ಟ ನಿರೂಪಿಸಿದರು.