ಸಿದ್ದಾಪುರ : ಕ್ಯಾನ್ಸರ್ ರೋಗ ಹಲವಾರು ಕಾರಣಗಳಿಂದ ಬರುತ್ತದೆ. ತಂಬಾಕು ಸೇವನೆ, ಧೂಮಪಾನ ಹೀಗೆ ಹಲವಾರು ಉದಾಹರಣೆಗಳನ್ನ ಕೊಡಬಹುದು. ಆದರೆ ಮಳೆ, ಗಾಳಿ, ಬಿಸಿಲಿನಿಂದ ರಕ್ಷಣೆ ನೀಡಲಿ ಎಂದು ಮನೆಗಳಿಗೆ ಹೊದಿಸುವ ಅಸ್ಬೆಸ್ಟೋಸ್ ಸೀಟುಗಳಿಂದಲೂ ಕ್ಯಾನ್ಸರ್ ಬರುತ್ತದೆ ಎಂದರೆ ನಂಬಲು ಸಾಧ್ಯವಿಲ್ಲ. ಆದರೆ ನಂಬಬೇಕು. ವಿಶ್ವ ಆರೋಗ್ಯ ಸಂಸ್ಥೆಯ ಅಂಗಸಂಸ್ಥೆ ಇಂಟರ್ ನ್ಯಾಷನಲ್ ಎಜೆನ್ಸಿ ಪಾರ್ ರಿಸರ್ಚ್ ಕ್ಯಾನ್ಸರ್ ಎನ್ನುವ ಸಂಸ್ಥೆಯ ಅಧ್ಯಯನದಲ್ಲಿ ಅಸ್ಬೆಸ್ಟೋಸ್ ಸೀಟುಗಳಿಂದ ಕ್ಯಾನ್ಸರ್ ರೋಗ ಬರುವುದು ಧೃಡಪಟ್ಟಿದೆ. 2011ರಲ್ಲಿ ಭಾರತದಲ್ಲಿ ಪೈಬರ್ ಮಿಶ್ರಿತ ಅಸ್ಬೆಸ್ಟೋಸ್ ಸೀಟ್‍ಗಳ ಮಾರಾಟ, ಸಂಗ್ರಹ ಹಾಗೂ ಉತ್ಪಾದನೆಯನ್ನು ಸುಪ್ರೀಂ ಕೋರ್ಟ್ ನಿಷೇಧಿಸಿದೆ. ಆದರೂ ಜಿಲ್ಲೆಯಲ್ಲಿ ಅಸ್ಬೆಸ್ಟೋಸ್ ಸೀಟ್‍ಗಳ ಮಾರಾಟ ಎಗ್ಗಿಲ್ಲದೆ ನಡೆಯುತ್ತಿದೆ. ಕಣ್ಣಿದ್ದು ಕುರುಡರಾಗಿರುವ ಅಧಿಕಾರಿಗಳ ವರ್ತನೆ ಹಲವಾರು ಅನುಮಾನಗಳಿಗೆ ಎಡೆಮಾಡಿಕೊಟ್ಟಿದೆ.
ಅಸ್ಬೆಸ್ಟೋಸ್ ಸೀಟ್‍ನಲ್ಲಿ ಏನಿದೆ?:ಸಿಮೆಂಟ್ ಮತ್ತು ಪೈಬರ್‍ನಿಂದ ತಯಾರಿಸುವ ಈ ಸೀಟ್‍ಗಳಿಗೆ ದೀರ್ಘಾವಧಿ ಬಾಳಿಕೆ ಬರುವ ಸಲುವಾಗಿ ಅಸ್ಬೆಸ್ಟೋಸ್ ಎನ್ನುವ ರಾಸಾಯನಿಕ ಬಳಸಲಾಗುತ್ತದೆ. ಈ ರಾಸಾಯನಿಕ ಮಿಶ್ರಿತ ಸೀಟ್‍ಗಳಿಂದ ಕಾರ್ಜಿಯೋಜಿನ್ ಉತ್ಪತ್ತಿಯಾಗುತ್ತದೆ. ಈ ಸೀಟ್ ಗಳಿಂದ ಹೊರಬರುವ ಫೈಬರ್ ಕಣಗಳನ್ನು ಉಸಿರಾಡಿದರೆ ನಾನಾ ರೀತಿಯ ಕ್ಯಾನ್ಸರ್ ಬರುತ್ತದೆ ಎಂದು ವಿಶ್ವ ಆರೋಗ್ಯ ಸಂಸ್ಥೆಯ ಅಂಗ ಸಂಸ್ಥೆ ಇಂಟರ್ ನ್ಯಾಷನಲ್ ಎಜೆನ್ಸಿ ಫಾರ್ ರಿಸರ್ಚ್ ಕ್ಯಾನ್ಸರ್ ಎನ್ನುವ ಸಂಸ್ಥೆಯ ಅಧ್ಯಯನದಲ್ಲಿ ಧೃಡಪಡಿಸಿದೆ.
ಅಸ್ಬೆಸ್ಟೋಸ್ ಸೀಟ್‍ನಿಂದ 5 ರೀತಿಯ ಕ್ಯಾನ್ಸರ್ :- ಕ್ಯಾನ್ಸರ್ ತಜ್ಞರ ಪ್ರಕಾರ ಪೈಬರ್ ಮಿಶ್ರಿತ ಸಿಮೆಂಟ್ ಸೀಟ್‍ಗಳಿಂದ ಹೊರಹೊಮ್ಮುವ ರಾಸಾಯನಿಕ ಪ್ರಕ್ರಿಯೆಗಳಿಂದ ಶ್ವಾಸಕೋಶ ಕ್ಯಾನ್ಸರ್, ಕಿಡ್ನಿ ಕ್ಯಾನ್ಸರ್, ಮಿಸೋತೆಲಿಯ ಎನ್ನುವ ಹೊಟ್ಟೆಯ ಕ್ಯಾನ್ಸರ್, ಪ್ರಾಕ್ರಟೈಸ್ ಹಾಗೂ ಧ್ವನಿ ಪೆಟ್ಟಿಗೆ ಕ್ಯಾನ್ಸರ್‍ಗಳು ಬರುತ್ತವೆ.
60ಕ್ಕೂ ಹೆಚ್ಚು ದೇಶಗಳಲ್ಲಿ ಅಸ್ಬೆಸ್ಟೋಸ್ ಸೀಟ್‍ಗಳ ಬ್ಯಾನ್:- ಇಂದು ಅಂದಾಜಿನ ಪ್ರಕಾರ ಇದರಿಂದಾಗುವ ದುಷ್ಪರಿಣಾಮಗಳಿಂದ 60ಕ್ಕೂ ಹೆಚ್ಚು ದೇಶಗಳಲ್ಲಿ ಅಸ್ಬೆಸ್ಟೋಸ್ ಸೀಟ್‍ಗಳನ್ನ ಬ್ಯಾನ್ ಮಾಡಲಾಗಿದೆ.
2011ರಲ್ಲಿ ಭಾರತದಲ್ಲಿ ಬ್ಯಾನ್:- ಅಸ್ಬೆಸ್ಟೋಸ್ ಸೀಟ್‍ಗಳಿಂದ ಆಗುತ್ತಿರುವ ದುಷ್ಪರಿಣಾಮ ಮತ್ತು ಈ ಮೂಲಕ ಜನರ ಸಾವುಗಳನ್ನ ಗಮನಿಸಿದ ಸುಪ್ರೀಂ ಕೋರ್ಟ್ 2011ರಲ್ಲಿ ಭಾರತ ದೇಶದಲ್ಲಿ ಪೈಬರ್ ಮಿಶ್ರಿತ ಸಿಮೆಂಟ್ ಸೀಟ್‍ಗಳ ಮಾರಾಟ, ಸಂಗ್ರಹ ಹಾಗೂ ಉತ್ಪಾದನೆಯನ್ನು ನಿಷೇಧಿಸಿದ್ದು ಈ ಬಗ್ಗೆ ಕ್ರಮ ಕೈಗೊಳ್ಳುವಂತೆ ಕೇಂದ್ರ ಮತ್ತು ರಾಜ್ಯ ಸರ್ಕಾರಕ್ಕೆ ನಿರ್ದೇಶನ ನೀಡಿದೆ ಎನ್ನಲಾಗಿದೆ. ಆದರೆ ಭಾರತದ ಹಲವೆಡೆ ಎಗ್ಗಿಲ್ಲದೆ ಅಸ್ಬೆಸ್ಟೋಸ್ ಸೀಟ್‍ಗಳ ಮಾರಾಟ, ಸಂಗ್ರಹ ಹಾಗೂ ಉತ್ಪಾದನೆ ನಡೆಯುತ್ತಿರುವುದು ದುರ್ದೈವದ ಸಂಗತಿಯಾಗಿದೆ.
ಸರ್ಕಾರಿ ಇಲಾಖೆಗಳ ದಿವ್ಯ ನಿರ್ಲಕ್ಷ್ಯ:– ಪರಿಸರ ಮಾಲಿನ್ಯ ನಿಯಂತ್ರಣ ಮಂಡಳಿ, ಕೈಗಾರಿಕಾ ಇಲಾಖೆ, ಆರೋಗ್ಯ ಇಲಾಖೆ, ಕಾರ್ಮಿಕ ಇಲಾಖೆ, ಮುನ್ಸಿಪಾಲ್ಟಿ ಡಿಪಾರ್ಟಮೆಂಟ್, ಗಣಿಗಾರಿಕೆ ಇಲಾಖೆ ಹೀಗೆ ಹಲವು ಇಲಾಖೆಗಳು ಇವುಗಳ ಮೇಲೆ ಕ್ರಮ ಕೈಗೊಳ್ಳಲು ಅವಕಾಶ ಹೊಂದಿದ್ದು ಆದರೆ ಎಲ್ಲಾ ಕಡೆ ಅಸ್ಬೆಸ್ಟೋಸ್ ಸೀಟ್‍ಗಳು ದೊರೆಯುತ್ತಿರುವುದು ಇಲಾಖೆಗಳ ದಿವ್ಯ ನಿರ್ಲಕ್ಷ್ಯವನ್ನ ಎತ್ತಿ ತೋರಿಸುತ್ತಿದೆ. ಮತ್ತು ಹಲವಾರು ಅನುಮಾನಗಳಿಗೆ ಎಡ ಮಾಡಿಕೊಟ್ಟಿದೆ. ಸುಪ್ರೀಂ ಕೋರ್ಟ್ ಆದೇಶವನ್ನು ಉಲ್ಲಂಘಿಸಿ ಕಾನೂನು ಬಾಹಿರವಾಗಿ ಇಂತಹ ಅಪಾಯಕಾರಿ ಅಸ್ಬೆಸ್ಟೋಸ್ ಸೀಟ್‍ಗಳ ಮಾರಾಟ ಮಾಡುತ್ತಿರುವ, ಸಂಗ್ರಹ ಮಾಡುತ್ತಿರುವ ಹಾಗೂ ಉತ್ಪಾದನೆ ಮಾಡುತ್ತಿರುವವರ ಮೇಲೆ ಈ ಮೇಲಿನ ಎಲ್ಲಾ ಇಲಾಖೆಗಳು ಜಂಟಿಯಾಗಿ ಪ್ರಕರಣ ದಾಖಲಿಸಿ ಕಾನೂನು ಕ್ರಮ ಕೈಗೊಳ್ಳಬೇಕೆನ್ನುವುದು ತಜ್ಞರ ಅಭಿಪ್ರಾಯ. ಇನ್ನಾದರೂ ಸಂಬಂಧಪಟ್ಟ ಅಧಿಕಾರಿಗಳು ಈ ಸೀಟ್‍ಗಳ ಬಗ್ಗೆ ಜಾಗೃತಿ ಮೂಡಿಸಿ ಜನಸಾಮಾನ್ಯರು ಮಾರಕ ರೋಗಗಳಿಗೆ ತುತ್ತಾಗದಂತೆ ನೋಡಿಕೊಳ್ಳಬೇಕಿದೆ.
Leave a Comment